मराठी प्रार्थना । Prayers in Marathi

जगी जे हीन अतिपतित, जगी जे दीन पददलित

तया जाऊन उठवावे, जगाला प्रेम अर्पावे ॥१॥

जयांना ना कोणी जगती सदा ते अंतरी रडती

तया जाऊन सुखवावे, जगाला प्रेम अर्पावे ॥२॥

समस्तां धीर तो द्यावा, सुखाचा शब्द बोलावा

अनाथा साह्य ते द्यावे, जगाला प्रेम अर्पावे ॥३॥

सदा जे आर्त अतिविकल, जयांना गांजती सकल

तया जाऊन हसवावे, जगाला प्रेम अर्पावे ॥४॥

कुणा ना व्यर्थ शिणवावे, कुणा ना व्यर्थ हिणवावे

समस्तां बंधु मानावे, जगाला प्रेम अर्पावे ॥५॥

प्रभूची लेकरे सारी तयाला सर्वही प्यारी

कुणा ना तुच्छ लेखावे, जगाला प्रेम अर्पावे ॥६॥

असे जे आपणापाशी असे, जे वित्त वा विद्या

सदा ते देतची जावे, जगाला प्रेम अर्पावे ॥७॥

भरावा मोद विश्वात असावे सौख्य जगतात

सदा हे ध्येय पूजावे, जगाला प्रेम अर्पावे ॥८॥

असे हे सार धर्माचे असे हे सार सत्याचे

परार्थी प्राणही द्यावे, जगाला प्रेम अर्पावे ॥९॥

जयाला धर्म तो प्यारा, जयाला देव तो प्यारा

त्याने प्रेममय व्हावे, जगाला प्रेम अर्पावे ॥१०॥

असो तुला देवा! माझा सदा नमस्कार

तुझ्या दयादातृत्वाला अंत नाहि पार ॥ असो…. ॥

तुझ्या कृपेने रे होतिल फुले फत्तराची

तुझ्या कृपेने रे होतिल मोति मृत्तिकेची

तुझ्या कृपेने रे होतिल सर्प रम्य हार

असो तुला देवा! माझा सदा नमस्कार ॥

तुझ्या कृपेने रे होइल उषा त्या निशेची

तुझ्या कृपेने रे होइल सुधा त्या विषाची

तुझ्या कृपेने रे होइल पंगु सिधुपार

असो तुला देवा! माझा सदा नमस्कार ॥

तुझ्या कृपासिंधूमधला बिंदु जरि मिळेल

तरि प्रभो! शतजन्मांची मत्तृषा शमेल

तुझे म्हणुनि आलो राया! बघत बघत दार

असो तुला देवा! माझा सदा नमस्कार ॥

दिवा पाहुनी लक्ष्मी येते करू तिची प्रार्थना

शुभंकरोति म्हणा, मुलांनो, शुभंकरोति म्हणा

शुभंकरोति कल्याणम्‌, शुभंकरोति कल्याणम्‌

जेथे ज्योती तेथे लक्ष्मी

उभी जगाच्या सेवाधर्मी

दिशादिशांतुन या लक्ष्मीच्या दिसती पाउलखुणा

या ज्योतीने सरे आपदा

आरोग्यासह मिळे संपदा

शत्रुबुद्धिचा विनाश होता सौख्य मिळे जीवना

दिव्या दिव्या रे दीपत्कार

कानी कुंडल मोतिहार

दिव्यास पाहून नमस्कार हा रिवाज आहे जुना

सर्वात्मका, शिवसुंदरा स्वीकार या अभिवादना

तिमिरातूनी तेजाकडे प्रभू आमुच्या ने जीवना ॥ धृ. ॥

सुमनांत तू, गगनांत तू

तार्‍यांमध्ये फुलतोस तू

सद्धर्म जे जगतामध्ये

सर्वांत त्या वसतोस तू

चोहीकडे रूपे तुझी जाणीव ही माझ्या मना ॥ १ ॥

श्रमतोस तू शेतामध्ये

तू राबसी श्रमिकांसवे

जे रंजले अन गांजले

पुसतोस त्यांची आसवे

स्वार्थावीना सेवा जिथे तेथे तुझे पद पावना ॥ २ ॥

न्यायार्थ जे लढती रणी

तलवार तू त्यांच्या करी

ध्येयार्थ जे तमी चालती

तू दीप त्यांच्या अंतरी

ज्ञानार्थ जे तपती मुनी, होतोस त्या तू साधना ॥ ३ ॥

करुणाकरा, करुणा तुझी

असता मला भय कोठले ?

मार्गावरी पुढती सदा

पाहीन मी तव पाउले

सृजनत्व या हृदयामध्ये नित जागवी भीतीविना ॥ ४ ॥

हंस वाहिनी सरस्वतीच्या, 

पदकमली रमते, 

माझे मन पावन होते ।।धृ.।।

वीणा हाती मंजूळ वादन

श्वेत कमल के मंगल आसन

राजहंस तव राजस वाहन

घे वंदन माते ||१||

मूर्ती साजरी नयन मनोहर

धवल वस्त्र किती शोभे सुंदर

चंद्रही भासे उदात्त अंबर

भारावून जाते ||२||

तू बुद्धि दे, तू प्रकाश दे, नवचेतना विश्वास दे

जे सत्य सुंदर सर्वथा आजन्म त्याचा ध्यास दे

सापडे ना वाट ज्यांना हो तयांचा सारथी

हरवले आभाळ ज्यांचे हो तयांचा सोबती

करिती तुझी जे साधना त्यांना तुझा सहवास दे

सन्मार्ग आणि सन्मती लाभो सदा सत्संगती

नीती ना ही भ्रष्ट हो जरी संकटे आली किती

पंखात ह्या बळ दे नवे झेपावण्या आकाश दे

शुद्धी दे, बुद्धी दे, हे दयाघना

शक्‍ती दे, मुक्‍ती दे आमुच्या मना

तरतम ते उमजेना, उमजेना सत्य

फसविते आम्हांला विश्व हे अनित्य

दिग्दर्शन मज व्हावे हीच कामना

स्वत्वाला विसरून जर भ्रमले हे चित्त

ऋजुतेवर मात करी द्रोह हा प्रमत्त

निर्भयता जागावी हीच प्रार्थना

अजाण आम्ही तुझी लेकरे तू सर्वांचा पिता

नेमाने तुज नमितो, गातो तुझ्या गुणांच्या कथा

सूर्यचंद्र हे तुझेच देवा, तुझी गुरेंवासरें

तुझीच शेते, सागर, डोंगर, फुले, फळे, पाखरे

अनेक नावे तुला तुझे रे दाही दिशांना घर

करिशी देवा सारखीच तू माया सगळ्यांवर

खूप शिकावे, काम करावे, प्रेम धरावे मनी

हौस एवढी पुरवी देवा हीच एक मागणी

देवा तुझे किती सुंदर आकाश

सुंदर प्रकाश सूर्य देतो

सुंदर चांदण्या चंद्र हा सुंदर

चांदणे सुंदर पदे त्याचे

सुंदर ही झाडे, सुंदर पाखरे

किती गोड बरे गाणे गाती

सुंदर वेलींची सुंदर ही फुले

तशी आम्ही मुले देवा तुझी

इतुके सुंदर जग तुझे जर

किती तू सुंदर असशील 

तुम्ही हो माता, पिता तुम्ही हो ।

तुम्ही हो बंधू, सखा तुम्ही हो ॥

तुम ही हो साथी, तुम ही सहारे ।

कोई ना अपना सिवा तुम्हारे ॥

तुम ही हो नईया, तुम ही खिवईया ।

तुम ही हो बंधू, सखा तुम ही हो ॥

तुम ही हो माता, पिता तुम्ही हो ।

तुम ही हो बंधू, सखा तुम्ही हो ॥

जो खिल सके ना वो फूल हम हैं ।

तुम्हारे चरणों की धूल हम हैं ॥

दया की दृष्टि, सदा ही रखना ।

तुम ही हो बंधू, सखा तुम्ही हो ॥

तुम्ही हो माता, पिता तुम्ही हो ।

तुम्ही हो बंधू, सखा तुम्ही हो ॥

मित्रांनो या लेखातील मराठी प्रार्थनांची हि माहिती आपल्याला कशी वाटली हे आम्हांला कंमेंटद्वारे जरूर कळवा. माहिती आवडल्यास नक्की शेअर करा.